Goierriko Hitza

Segurako Udalak 2.800.000 euroko aurrekontua izango du aurtengo urtean udal gastuei eta inbertsioei aurre egiteko. Horrela erabaki zuten Segura Lantzeneko 6 zinegotziek osoko bilkuran. EAE-ANVko 3 hautetsiek ez zuten onartu aurrekontua. Aurrekontuaren barruan inbertsiorik garrantzitsuena udaletxeko eraikinean egingo dute. Maixabel Telleria Segurako alkateak jakitera eman duenez «udaletxeko eraikinari teilatua eta teilatu hegala konpontzeko asmoa dugu. Teilatua jada zaharkituta dago eta teilatu hegaleko egurra berriz ustelduta». Eraikuntzako solairuetan irisgarritasuna bermatzeko igogailua jarriko diote. Udaletxearen atarian eraikiko dute, eskaileretako hutsunea aprobetxatuz. Diruaren aldetik inbertsiorik handiena ez izan arren garrantzi berezia dute Hirigintza Plana egiteko bideratuko dituzten 90.000 euroek. Alkateak jakinarazi duenez «plana egiteak etorkizunean nolako Segura nahi dugun zehazten lagunduko digu». Hilerrian konponketak egiteko 30.000 euro bideratuko dituzte. Lehengo nitxoen ondoan 12 nitxo berri eraikitzeko asmoa dute. Kolunbarioak eta hezurtokiak ere egingo dituzte, errauts eta hezurrentzat. Atseden elkartea zaharberritzeko 12. 000 euro jasotzen dira aurrekontuan.

Segurako EAE-ANVko hautetsiek ez zuten onartu Segura Lantzenekoek adostutako aurrekontua. Euren iritziz aurrekontu «erabat desorekatua» da. Kasurik gehienetan aurreko urteetakoak hartu eta «moztu eta pegatu» egin dituztela salatzen du EAE-ANVk. Eurei azterketa txukun bat egiteko denbora oso gutxi utzi zietela uste dute.
Bestalde herritarren partaidetzarik gabe eginak direla eta beraz «inposatu nahi baldin badute euren ardura dela» adierazi zuten.
Kultur ekintzetako diru banaketa irizpidea «guztiz partziala eta onartezina» dela gaineratu zuten. «Ekintza antolatzen duen taldearen izaeraren arabera banatzen dituzte, besteok herritarrak izango ez bagina bezala. Iparra-Hegoako antolakuntzak esaterako bere kabuz lortu behar du diruaren %92a».