Goierriko Hitza

Espainiako Auzitegi Nazionaleko Baltasar Garzon epailearen aginduz, Polizia Nazionalak 23 pertsona atxilotu ditu atzo gauean Seguran, orain arte uste zen kopurua baino bat gehiago, tartean Batasunaren Mahai Nazionaleko kideak. Aurreneko atxiloketa Olaberriko Carrefour saltokiaren parean izan zen; Joseba Permach eta Joan Joxe Petrikorena zihoazen autoa geldiarazi eta biak atxilotu zituzten poliziek. Aldi berean, gaueko 21:30ak aldean, Segurako bi sarrera-irteerak itxi egin zituzten, errepide kontrolak jarriz. 01:30 aldera utzi du Poliziak Segura, bizilagunen "alde hemendik" eta "utzi bakean" oihuen artean. Goizean, ordea, hiru atxilotu segurarren etxebizitzak miatzeari ekin dio.

Guztira, 23 lagun atxilotu dituzte Segurako polizi-operazioan. Tartean, Permach eta Petrikorenarekin batera, Rufi Etxeberria eta Juan Kruz Aldasoro izan litezke beste atxilotuetako batzuk. Hiru segurar ere badaude atxilotuen artean.
Atxilotuak Donostiara eraman dituzte, Espainiako Poliziaren komisaldegira. Hurrengo orduetan Madrilera eramatekotan dira.
’El Pais’ egunkariaren arabera, orain arteko Mahai Nazionalaren eta berriaren artean kargu aldaketa egiteko zen bilkura, baina gezurtatu egin dute gertaera hori Batasuna inguruko iturriek, Euskadi Irratiak aipatu duenez.
Garzonek 35/2002 auzia zuzentzen du Batasunaren kontra, ETArekin lotura duela argudiatuta. Duela bost urte ebatzi zuen Batasunaren ekinbidearen etena. Orain esan duenez, «legez kanpoko aktibitateak» egiten ari ziren alderdi abertzaleko buruzagiak. Hari jarraiki, ekinbidea etenda izaki, atzo buruzagitzak eginiko bilkurak «legea urratu» egiten du.
Gauean Poliziak Segura osoa itxita izan du, eta hango bizilagunek soilik sartu ahal izan dira herrigunera, sarreretako kontroletan identifikatu ondoren. Atzo arratsaldean errepide-kontrol ugari egon ziren inguru hartan. Euskadi Irratiak Marixabel Telleria Segurako alkatearekin hitz egin du eta hark kontatu du gauerdian Kultur Etxeko miaketan lekuko izateko deitu ziotela, batzarra han egin baitzuten. Antza denez, eskuz idatzitako oharrak zituen paper bat eraman dute bilera gelatik eta telefono zenbakiak zituen beste paper bat tabernatik.

01:30 aldera utzi du Poliziak Segura, bizilagunen "Alde Hemendik" eta "Utzi bakean" oihuen artean.

• Hiru goierritar daude atxilotuen artean
• Mobilizazioak deitu dituzte atxiloketen kontra
• Zeraingo Mendarte baserria miatzen ari dira
• 23 atxilotuen zerrenda atera du Askatasunak
• Erreakzioak
• Segurako Udalaren adierazpena