Goierriko Hitza

2009-06-19 | 15:46:06

Aseguruak euskaraz egin ahal izateko kanpaina jarri dute martxan Seguran

Euskara taldeak eta Udalak bat egin dute Kontseiluak, Behatokiak eta Ziurtagiriaren Elkarteak abiatutako kanpainarekin

'Euskaraz seguruago' lelopean aseguru-etxeetan eragin eta jendeak aseguruak euskaraz egin ahal izateko kanpaina jarri dute abian, Euskararen Gizarte Erakundeen Kontseiluak, Hizkuntz Eskubideen Behatokiak eta Ziurtagiriaren Elkarteak. Seguran Hitz edo irri... Euskaraz Elkarri euskara taldeak eta bertako Udalak bat egin dute kanpaina horrekin eta beraz, Seguran ere martxan jarri dute. Horrela, norbanakoak, herriko enpresak, saltegiak eta bestelako entitateak euren aseguruak euskaratzera gonbidatu dituzte. «Euskara Euskal Herriaren berezko hizkuntza izanik, hizkuntzarentzat esparruak garatu eta zabaldu nahi baititugu, bizitza euskaraz normaltasunez egiteko».

Ez du erantzunik

2009-05-02 | 16:20:55

Giro jatorrean eman diete hasiera segurarrek Santikutz jaiei

Mokadua, Ume eta Helduen Toka Lehiaketak eta bazkaria egin dituzte gaur; bihar txirrindulari porba jokatuko da.

Gaur beheko auzoan elkartu dira segurarrak Santikutz jaiei hasiera emateko. Urtero bezala, aurten ere bi egunetarako egitaraua prestatu dute. Ez dira festa luzeak beraz, baina giro jatorrean igarotzen dituzte bertakoek. Eguerdiko hamabietan meza izan da Beheko Kurutzan eta ondoren mokadutxoa egiteko aukera izan dute auzora hurbildutakoek. Bertako bizilagunak izan dira gainera, erosketak egin, jakiak prestatu eta zerbitzatu dituztenak. Guztira hamar bat laguneko taldea ibili da prestaketa lanetan.

Ez du erantzunik

2009-02-02 | 16:10:34

Jose Antonio Blanco 'Txuri' ordiziarrak jantzi du Euskadiko txapela Seguran

Goierriko korrikalariak aurrealdeko postuetan ibili dira maila guztietan

Jose Antonio Blanco Txuri atleta ordiziarrak Euskadiko eta Euskal Herriko txapelak jantzi zituen atzo, Segurako proban. Blancorekin batera, asko izan dira aurreko postuetan ibili diren goierritarrak; taldekako Euskadi eta Euskal Herriko txapelak ere Txindoki atletismo taldeak irabazi izana da horren adibide. Emakumezkoen maila nagusian berriz, Raquel Llamas arabarrak jantzi zuen txapela eta Ainhoa Sanz urretxuarra bigarren izan zen. Azkenik, beteranoen mailako lasterketa Goierri Garaia taldeko Ramon Otegik irabazi zuen, eta emakumezkoetan, bigarren postua egin zuen Elena Calvillok.

Ez du erantzunik

2008-12-20 | 18:25:42

Guztira 164 lan aurkeztu dituzte Ipuin, Bertso eta Marrazki Sariketara

Elorri kultur elkartekoek atzo banatu zituzten sariak, aipamenak eta parte hartzaile bakoitzarentzako opariak Segurako kultur etxean

Elorri kultur Elkarteak, Segurako Udalaren laguntzarekin antolatutako V. Ipuin, Bertso eta Marrazki Sariketara guztira 164 lan aurkeztu dituzte ikasleek. Horietatik 82 ipuinak dira, 21 bertsoak eta 61 marrazkiak. Segura, Zegama eta Urretxuko herri eskolako haurrek, Ziburuko kolegiokoek eta Urruñako ikastolako ikasleek parte hartu dute lehiaketan. Atzo, Elorri kultur elkarteko kideek Segurako kultur etxean banatu zizkieten haurrei sariak eta aipamenak, gurasoen begiradapean. Parte hartzaile bakoitzarentzako oparitxo bana ere prestatu zituzten antolatzaileek. Sari banaketaren ondoren hamaiketakoa egin zuten Elorri elkartean.

Ez du erantzunik

2008-11-05 | 12:48:30

Idiazabal-Zegama bitartean bidegorria eraikitzeko hurrengo urratsa Seguran egingo du Foru Aldundiak

Madurako zatia eta Idiazabal-Segura lotuko ditu 300 metroko bidegorri berriak

Goierriko bidegorri sarea luzatzeko beste obra bat gauzatuko du Gipuzkoako Foru Aldundiak 2009an. Seguran eraikiko dute txirrindularientzat bide zati berria, gaur egun eginda eta erabilgarri dauden beste bi zati lotzeko. Segurako Maduran (egina) eta Idiazabal-Segura bitartekoa (egina) lotuko ditu 300 metroko bidegorri berriak. Horrez gain, 2009an Segura-Mutiloa (2,5 km) bidegorria egiteko asmoa ere badu Diputazioak.

Ez du erantzunik

2008-11-03 | 18:02:52

Literatur tertuliak egingo dituzte Seguran irakurzaletasuna bultzatzeko

Sei lagunek eman dute izena eta abenduan egingo dute lehen tertulia; interesa duenak izena eman dezake oraindik

Seguran Piztu!, euskaldunon kontzientzia piztu arazteko kanpainaren barruan, Literatur Tertuliak egingo dituzte. Helburuak, herritarren irakurzaletasuna sustatzea eta bide batez, euskarazko liburuak kontsumitzea dira. Aitor Calvillo Segurako EBPNaren kudeatzaileak esan duenez, sei lagunek eman dute izena eta taldea jada osatuta dago. Abenduan egingo dute lehendabiziko tertulia. Dena den, ekimen horretan parte hartzeko interesa duenak oraindik ere eman dezake izena, Calvillori 649 01 12 62 telefono zenbakira deituta.

Ez du erantzunik

2008-07-12 | 20:27:32

Erdi Aroko festarekin bere erroetara itzuli da Segura

Eguraldiak askorik lagundu ez badu ere, festak aurrera darrai

Laurehun bat herritarrek parte hartu dute Segurako Erdi Aroko festaren aurreneko egunean. Euri eta lanbro, eguraldiak askorik lagundu ez badu ere, giro onean ospatu ahal izan dute arratsalde parteko jaia. Guztira, hogeita hamabost erakustoki jarri dituzte, atari , lanbide eta tailerren artean. Erdi Aroko Segura nolakoa zen irudikatzeko, gari biltegia, sutegia, ehulegileak, arotzak edota harginak zeuden batean eta bestean. Baina lanbide zaharrak ez ezik, garai hartako maila sozial ezberdinetako pertsonaiak ikusteko aukera egon da. Noblezia, inkisizioa, sorginak, eskribaua edota eskaleak ere berpiztu eta herriko kaleetan barrena ibili dira gaur.

• Igandean jarraituko du festak

Ez du erantzunik

2008-06-25 | 18:41:26

Euskara Elkartekoek irabazi dute I. Pintxo Lehiaketa

Urdaiazpikoa, York urdaiazpikoa, gazta, irabiasagarra eta intxaurrak zituen pintxoa saritu dute epaimahaiko kideek

Hitz edo Irri... Euskaraz Elkarri euskara elkarteko ordezkariek, Oski Garaialdek, Lierni Elortzak eta Rafael Gerrikok irabazi dute gaur goizean San Joan I. Pintxo Lehiaketa. Lau mota desberdineko pintxoak egin behar izan dituzte. Hiru mota egiteko osagaiak zehaztuta zeuden. Batean arrautza egosiak, txaka, hegaluzea, letxuga eta tomatea erabili behar zituzten. Bigarrenean urdaiazpikoa, York urdaiazpikoa, gazta (hiru mota), irabiasagarra eta intxaurrak eta hirugarrena egiteko berriz pipermina, antxoak eta azeitunak. Laugarren pintxo mota egiteko osagaiak norberak aukeratu zitzakeen. Eta guztiak egiteko mahonesa, ogia (hiru mota), tipula, baratxuriak, olioa eta gatza zituzten. Epaile lanetan herriko tabernetako sukaldariak aritu dira. Euren lana itxurarik onena zuen pintxoa aukeratzea. Minutu batzuk hartu dituzte pintxo guztiak begiratzeko eta guztien artean Hitz edo Irri... Euskaraz Elkarri euskara taldeko ordezkariek egindako pintxoa saritzea erabaki dute.

Ez du erantzunik